Австриялық компаниялар Қазақстанда өндірісті оқшаулау мүмкіндігін қарастыруда
KAZAKH INVEST ҰК АҚ-ның Еуропадағы шетелдік өкілдігі Қазақстан Республикасының Австрия Республикасындағы Елшілігімен бірлесіп, Қазақстан Республикасында өндірістердің бір бөлігін әлеуетті орналастыру және инвестициялық жобаларды іске асыру бойынша австриялық компаниялармен бірқатар келіссөздер жүргізді.
Австрия Республикасына сапары барысында KAZAKH INVEST ұлттық компаниясының Еуропа елдеріндегі шетелдік өкілі Сәкен Олжабаев Австрияның Федералды экономикалық палатасының халықаралық департаментінің директоры Козима Штайнермен кездесіп, екіжақты ынтымақтастықты тереңдету және инвестициялық әлеуетті ілгерілету жөніндегі жұмысты күшейту және австриялық бизнес-қоғамдастық арасында Қазақстандағы шетелдік инвесторларды мемлекеттік қолдау шараларын таныстыру мәселелерін талқылады. Атап айтқанда, Австрияның тоғыз федералды жерінің әрқайсысының аймақтық палаталарымен үнемі онлайн және тірі форматта іс-шаралар өткізу ұсынылды. Сондай-ақ алдағы іс-шаралар талқыланды, оның шеңберінде екі ел арасындағы инвестициялық ынтымақтастық талқылаудың басты тақырыптарының бірі болады.
Сондай-ақ, сапар барысында Lasselsberger Group, Traktionssysteme Austria, Voestalpine Railway Systems, Voith Hydro, BGM Partners сияқты компаниялардың басшылығымен бірқатар кездесулер өткізіліп, Қазақстандағы әлеуетті инвестициялық жобалар талқыланды.
Осылайша, Lasselsberger Group компаниясының иесі Йозеф Лассельсбергер Қазақстан Республикасының Австрия Республикасындағы Төтенше және Өкілетті Елшісі Әлібек Бақаевпен кездесуде қазіргі уақытта Қазақстанда керамикалық плиткаларын шығару мүмкіндігін қарастырып жатқанын хабарлады. Австриялық кәсіпкер үстіміздегі жылдың жазында керамикалық плиткаларды өндіруге қажетті отқа төзімді саз кен орындарының болуы туралы геологиялық ақпаратты алу және зерделеу мақсатында Қазақстанға барғанын хабарлады. Тараптар осы бағыттағы жұмысты жалғастыруға және Й.Лассельсбергердің инвестициялық жоба бойынша әлеуетті серіктестермен кездесу үшін келесі жылы Қазаұстанға сапарын ұйымдастыруға келісті.
Voestalpine Railway Systems компаниясының Вице-президенті Роланд Дисспен кездесу барысында ҚР инвестициялық әлеуеті таныстырылды, Қазақстандағы саяси өзгерістер талқыланды, шетелдік инвесторларды мемлекеттік қолдау шаралары туралы ақпарат жеткізілді. Р. Дисс компанияның Орталық Азия өңіріндегі жаңа жобаларды қарауға дайындығы туралы хабарлады. Компания теміржол индустриясында жұмыс істейтін қазақстандық кәсіпорындармен серіктестікте бағыттамалы бұрмаларды, жетектерді, бұғаттауларды, анықтау жүйелерін және сигналдық шешімдерді (DLD/s) өндіруді оқшаулауды ұйымдастыру мәселелерін талқылауға дайын.
Винер Нойдорф қаласында Traktionsysteme Austria компаниясының тартқыш қозғалтқыштары мен редукторларын өндіру және құрастыру зауытына бару барысында ҚР-да машина жасау саласын дамыту әлеуеті талқыланды. Компания ұсынылған мүмкіндіктерге қызығушылық танытты және сұраныстың белгілі бір көлеміне қол жеткізген кезде өз өндірісін Қазақстанда ұйымдастыруға дайын. Компанияның Вице-президенті Йоханнес Менсдорф-Пуйи жолаушылар көлігінің әлемдік нарығында асинхронды электромеханикалық тартқыш қозғалтқыштарға сұраныстың артып келе жатқанын және ірі компаниялардың энергия тиімділігі мен ұзақ қызмет ету мерзіміне байланысты дәстүрлі қозғалтқыштардан бас тарту тенденциясын атап өтті. Тараптар компанияның Қазақстандағы машина жасау индустриясын дамыту жөніндегі ынтымақтастығы туралы ұсынысын талқылау үшін мемлекеттік органдардың өкілдерімен келіссөздер ұйымдастыру туралы уағдаласты.
Қуаты 1 МВт-тан 5 ГВт-қа дейінгі гидроэлектростанцияларға арналған электромеханикалық турбиналар мен генераторларды өндіруге маманданған Voith Hydro компаниясы Қазақстанда шағын (30 Мвт-қа дейін) және ірі ГЭС-ті жарақтандыру жөніндегі жобаларды іске асыруға қызығушылық туралы хабарлады. Компанияның Халықаралық жобалар бөлімшесінің басшысы Стюарт Кинг Орталық Азия мен ТМД елдеріне деген қызығушылықтың артқанын және Қазақстандағы гидроэнергетиканың орасан зор әлеуеті туралы атап өтті. Компания өңірде (Әзірбайжан, Тәжікстан, Қырғызстан, Ресей) бірқатар жобаларды іске асырып үлгерді, алайда Қазақстанды ГЭС үшін турбиналар мен генераторлар өндірісінде құзыреттер құру, басқаруды автоматтандыру және станциялардың энергия тиімділігін арттыру жөніндегі орталық нүкте ретінде қарастырады. Келіссөздер барысында инвестициялық қызметті мемлекеттік қолдау шаралары мен ЖЭК электр энергиясын өндіруге аукциондық сауда-саттықты өткізу және ҚР-да инвестициялық келісімшарттар жасасу қағидаларына қатысты ақпарат жеткізілді. Сонымен қатар, компанияға KAZAKH INVEST ҰК АҚ-ның тауашалық жобалары қатарынан гидроэнергетика саласындағы нақты жобалар ұсынылды.
Анықтама:
Австрияның Федералды экономикалық палатасы (нем. Wirtschaftskammer Österreich, WKÖ) - ұлттық және халықаралық деңгейде австриялық іскерлік қоғамдастықтың қызметін үйлестіретін және мүдделерін білдіретін ұйым. Австрияның Экономикалық палаталар жүйесі шеңберінде ол Австрияның Федералды Штаттарының әрқайсысының тоғыз палатасын біріктіретін жалпыұлттық ұйым ретінде жұмыс істейді. Сонымен қатар, оған елдің әр түрлі салаларын білдіретін 110 сауда қауымдастығы кіреді.
Lasselsberger Group - шикізат, құрылыс материалдары мен керамикалық плиткалардың еуропалық өндірушісі. Әлемнің 17 елінде 67 өндірістік кәсіпорны мен 13 мыңнан астам қызметкері бар, штаб-пәтері Австрияда орналасқан Lasselsberger Group шикізат, құрылыс материалдары мен керамикалық бұйымдар өндірісі бойынша Еуропадағы жетекші компаниялардың бірі болып табылады.
Voestalpine AG еншілес кәсіпорны болып табылатын Voestalpine Railway Systems теміржол инфрақұрылымының жүйелік шешімдерінде әлемдік көшбасшы болып табылады, рельстерге, бағыттамаларға, дабылдарға және мониторингке арналған көрнекті өнімдерді, логистиканы және қызметтерді ұсынады.
TSA теміржол және автомобиль көлігі үшін электромеханикалық жетектер мен тартқыш қозғалтқыштардың және асинхронды және тұрақты магниттік жетектердің жетекші өндірушісі болып табылады.
Voith Hydro әлемдегі электромеханикалық турбиналар мен генераторлардың, реттегіштердің және су электр станцияларын басқару шкафтарының жетекші өндірушісі болып табылады. Voith Hydro-жылдық айналымы 4,3 млрд еуродан асатын, бүкіл әлем бойынша 20 мың қызметкері бар Voith Group еншілес компаниясы.
