Дүниежүзілік еркін аймақтар ұйымы қазақстандық АЭА және ИА дамуына жоғары баға берді
Павлодар облысының әкімдігі және Дүниежүзілік еркін аймақтар ұйымы «KAZAKH INVEST» ҰК» АҚ қолдауымен Қазақстан Республикасының инвестициялық алаңдарын дамытуға бағытталған алғашқы «FREE ZONES OF the FUTURE» іс-шарасын ұйымдастырды.
Іс-шараның мақсаты қазақстандық тарапқа инвестициялар тартудың әлемдік тәжірибесімен және жаһандық трендтерімен, сондай-ақ әлемдік деңгейдегі инвестициялық алаңдарды жүргізу тәжірибесімен танысуға бірегей мүмкіндік беру болып табылады.
Онлайн-конференцияға ДЕАҰ жобаларының жетекшісі Зои Харрис, ДЕАҰ оқыту бойынша бас маман Мухан Гурушвами және Киль әлемдік экономика институтының докторанты Саския Меухельбек қатысты. Қазақстан тарапынан Қазақстанның арнайы экономикалық және индустриялық аймақтарын басқару органдарының бірінші басшылары, сондай-ақ инвестициялар мәселелеріне жетекшілік ететін облыстар мен қалалар әкімдерінің орынбасарлары сөз сөйледі.
Вебинарды аша отырып, Дүниежүзілік еркін аймақтар ұйымының төрағасы Мұхаммед әл Заруни құттықтау сөз сөйледі.
«Біз еркін аймақтарды дамыту мүмкіндіктерін көріп отырмыз, өйткені экономика саяси реформалар мен озық технологияларды пайдалану арқылы өңірлік үйлестіру мен интеграцияны арттыруға ұмтылады. Сонымен қатар, еркін аймақтар ең тұрақты түрде жандануға шоғырланған жағдайда болашаққа барынша дайын бола алады. Өзінің экологиялық, әлеуметтік және басқарушылық үлесінің ашықтығына ерекше назар аудару қажет. Сонымен қатар, жұмысты БҰҰ-ның Тұрақты даму мақсаттарына сәйкес ұйымдастыру олардың экономикалық мақсаттары мен әлеуметтік дамуына қол жеткізу үшін жаңа жолдар ашады».
Өз кезегінде Зоя Харрис ДЕАҰ мамандары бірқатар сертификаттау бағдарламаларын, сондай-ақ еркін аймақтарды дамытуды қолдау бойынша арнайы ресурстарды әзірлегенін атап өтті. Оның айтуынша, аталған бағдарламалар барлық мүдделі тараптарға көмектесетін жаһандық стандарттардың жаңа жиынтығын белгілеуге ықпал ететін болады.
Іс-шара барысында шетелдік қатысушылар Қазақстанның АЭА мен ИА дамыту бойынша жұмыстарын, оның ішінде цифрландыру және жолға қойылған коммуникациялар есебінен пандемия салдарын барынша азайту бойынша шаралар қабылдағанын, сондай-ақ құнды ұсыныстар мен ұзақ мерзімді стратегияларды қайта қарағанын жоғары бағалады.
«Конференция цифрлық форматта инвестициялар тартудың іргетасын қалайды: цифрландырудың әлемдік үрдісі жағдайында инвестициялар тарту мәселесі де жаңа деңгейге өтеді - ағымдағы шындықта онлайн инвесторларды тартуға болады», - деп қорытындылады Павлодар облысы ИИДБ басшысы Әйбек Тұрсынғалиев.
Анықтама: World Free Zones Organization 2014 жылы Женевада құрылған, орталық кеңсесі Дубайда орналасқан. Бұл еркін аймақтарды, өнеркәсіптік парктерді, сондай-ақ бүкіл әлемнің ерекше аймақтарын біріктіретін әлемдегі жалғыз ұйым. Ол инвесторларға бүкіл әлем бойынша инвестициялық алаңдарды таңдауға көмектесуге, сондай-ақ қатысушылар арасында тәжірибе мен білім алмасу арқылы осы құралды қолдауға және дамытуға бағытталған. Бүгінде дүниежүзілік еркін аймақтар ұйымына әлемнің 126 елінен 50 мыңнан астам компания кіреді.
«Павлодар» арнайы экономикалық аймағы 2019 жылдан бастап World Free Zones Organization компаниясының Орталық Азиядағы ресми өкілі болып табылады.
