Британдық RDX Sports бренді Қазақстанда спорттық жабдықтар өндірісін жергіліктендіруді жоспарлап отыр
«KAZAKH INVEST» ұлттық компаниясы» АҚ Басқарма Төрағасының орынбасары Азамат Қожанов Emarat Developers компаниясының бас директоры Саид Фархан Гилани және RDX компаниясының серіктесі Ризван Хуссейнмен келіссөздер жүргізді. Кездесу барысында Қазақстанда спорттық жабдықтар өндірісін жергіліктендіру, бірлескен брендті іске қосу және компанияның өңірлік кеңсесін ашу жоспарлары талқыланды.
1999 жылы Манчестер қаласында негізі қаланған RDX Sports – жаһандық деңгейдегі жекпе-жек өнеріне, фитнеске және күштік жаттығуларға арналған жабдық пен құрал-жабдықтар өндірушілерінің бірі. Компания инновациялық технологияларды қолдануымен, өз өндірістік қуаттарымен және жаһандық қамтуды қамтамасыз ететін цифрлық D2C (тікелей тұтынушыға) үлгісімен танымал. RDX портфелінде алты халықаралық патент, 200-ден астам тіркелген тауар таңбасы және 150-ден астам бірегей өнеркәсіптік дизайн бар.
Қазақстанда өндірісті жергіліктендіру жобасы өнімдердің кең ауқымын қамтиды. Атап айтқанда, бокс және MMA қолғаптары, шлемдер, қорғаныс құралдары (оның ішінде CE және UKCA стандарттарына сай сертификатталған), капалар, бинттер, бапкерлерге арналған жабдықтар, бокс қаптары мен манекендері (еденге орнатылатын үлгілерді қоса алғанда), сондай-ақ фитнес пен жаттығу залына арналған қолғаптар өндіріледі. Сонымен қатар, балаларға арналған тауарлар, спорттық киім және аксессуарлар шығару да көзделген. Барлық өнімдер RDX-тің Quadro Dome, IMF, Tri-Korta, Polygonal Fusion және Octa-Truss сияқты патенттелген технологияларын қолдана отырып жасалады. Бұл өндірістің жоғары халықаралық стандарттарға сай болуын қамтамасыз етіп, өнімдерді ішкі нарықпен қатар ЕАЭО елдері мен Орталық Азияға экспорттауға мүмкіндік береді.
Жоба технология трансферін, жаңа жұмыс орындарын құруды және жеңіл өнеркәсіп саласында білікті кадрларды дамытуға бағытталған.
Кездесу барысында «KAZAKH INVEST» ұлттық компаниясы» АҚ Басқарма Төрағасының орынбасары Азамат Қожанов атап өтті:
«Қазақстан жоғары технологиялық өндірістердің өңірлік орталығына айналуға ұмтылып отыр. Біздің елде байланыс спорт түрлері кең танылған, сондықтан RDX Sports сияқты жаһандық көшбасшының елімізде өндірісті жергіліктендіруге қызығушылық танытуын жоғары бағалаймыз. RDX Sports қатысатын бұл жоба – халықаралық брендтерді жергіліктендіру өндірістік базаны дамытуға, білікті жұмыс орындарын құруға және технологиялық шешімдерді трансферлеуге қалай ықпал ететінінің нақты мысалы бола алады. KAZAKH INVEST жобаны жүзеге асырудың барлық кезеңдерінде — алаң таңдауынан бастап өнім шығаруға дейін — толық қолдау көрсетуге дайын», — деп атап өтті Азамат Қожанов.
Қазақстанда RDX Sports өндірісін іске қосу мүмкіндігі спорт индустриясын, жеңіл өнеркәсіпті және экспортқа бағытталған өндірістерді дамытуға жаңа серпін береді.
