Чилилік компания Қазақстанда өндіріс ашады
Астана халықаралық форумы аясында Қазақстан Республикасының Сыртқы істер министрлігі мен чилилік Compañía Electro Metalúrgica S.A. компаниясы арасында болат ұнтақтау шарларын өндіру бойынша инвестициялық жобаны іске асырудың негізгі қағидаттары туралы Негіздемелік келісімге қол қойылды. Жоба Жетісу өңірінде жүзеге асады деп жоспарлануда, жобаның құны 60 миллион доллардан асады. Жоба «KAZAKH INVEST» ҰК» АҚ қолдауымен жүзеге асырылады.
ME Elecmetal – тау-кен өнеркәсібі нарығына арналған арнайы болат бөлшектерін, ұнтақтау құралдарын және басқа да өнімдер мен қызметтерді өндірушілер мен дистрибьюторлардың жетекші әлемдік өндірушілерінің бірі. Компанияның таза жылдық табысы 600 миллион доллардан асады. Компания әлемнің 40 елінде бар. Құю зауыттарының өндірістік қуаты 134 000 тонна, ұнтақтағыш медиа зауыттары - 600 000 тонна.
Компанияның бас директоры Эухэньо Артеага өңірде қалыптасқан қазіргі жағдайда Қазақстан бұл жобаны жүзеге асыру үшін ең оңтайлы жер екенін атап өтті.
«Біз Қазақстанда жоғары технологиялық өндіріс арқылы шикізатты қайта өңдеуді жолға қойғымыз келеді. Біз Қазақстанды Орталық Азия хабы ретінде қарастырамыз, ол жерден өнімді ел ішінде ғана емес, сонымен қатар ТМД және Орталық Азия елдеріне де экспорттайтын боламыз», - деді Эухэньо Артеага.
Қазақстан Республикасы Сыртқы істер министрінің орынбасары Алмас Айдаров Қазақстандағы тау-кен металлургия кешені басым бағыттардың бірі екенін және өңдеу өнеркәсібіне осындай ірі ойыншылардың келуі саланы дамытудың жаңа перспективаларын ашатынын айтты.
«KAZAKH INVEST» ҰК» АҚ Инвестициялық жұмыс тобы бөлімшесінің жоба жетекшісі Бауыржан Айтқұлов бір жылдан астам ұлттық компания қызметкерлері бұл инвесторды тарту үшін жұмыс істеп жатқанын айтты.
«Бір жыл бұрын компания өкілдері жобаны жүзеге асыру мүмкіндігін қарастыру үшін Астанаға келді. Осы сәттен бастап біз жобаны белсенді түрде дамытуға кірістік. Көптеген келіссөздер мен консультациялардың нәтижесінде бүгін Жетісу өңірінде жобаны жүзеге асыру туралы келісімге қол жеткіздік», - деді Б.Айтқұлов.
Жобаны жүзеге асыру металлургия өнеркәсібіне елеулі үлес қосып, елдер арасындағы қарым-қатынасты кеңейтудегі маңызды қадам болмақ.
