Астанада британдық Ardingly College халықаралық мектебінің жаңа кампусының құрылысына капсула салу рәсімі өтті
Астанада Ardingly Astana жаңа халықаралық білім беру кампусының құрылысын бастауға арналған салтанатты капсула салу рәсімі өтті. Бұл – Ardingly College британдық мектебінің Қазақстандағы алғашқы филиалы. Жоба «KAZAKH INVEST» ҰК» АҚ қолдауымен және Ұлыбританияның Ardingly College мекемесімен әріптестікте жүзеге асырылып жатыр.
Іс-шараға Қазақстандағы Ұлыбритания Елшілігінің өкілдері, Ardingly College және Ardingly Astana, Primus Education, KAZAKH INVEST компанияларының басшылығы, сондай-ақ жоба серіктестері мен іскерлік қауымдастық өкілдері қатысты.
Жаңа кампус 1000 оқушыға арналған және ең жоғары халықаралық стандарттарға сәйкес салынады. Онда заманауи оқу сыныптары, музыка, театр және цифрлық технология кабинеттері, ғылыми зертханалар, спорт нысандары және жатақхана қарастырылған. Ашылуы 2026 жылға жоспарланған.
Ardingly Astana Қазақстан мен Орталық Азия елдерінен келген оқушыларға арналған білім беру хабына айналады. Кампус британдық академиялық үлгіні инновациялық оқыту тәсілдерімен үйлестіре отырып, әлемнің жетекші жоғары оқу орындарына түсуге даярлайды. Жоба жаңа жұмыс орындарын құруға, халықаралық педагогтар мен мамандарды тартуға, тәжірибе алмасуға және білім беру интеграциясын тереңдетуге мүмкіндік береді.
KAZAKH INVEST ҰК АҚ Басқарма төрағасының орынбасары Азамат Қожанов өз сөзінде адами капиталды дамытудағы жобаның маңыздылығын атап өтті:
«Астанадағы Ardingly College жаңа халықаралық кампусының капсула салу рәсіміне қатысу – мен үшін үлкен мәртебе. Бұл тек білім беру саласы үшін емес, бүкіл ел үшін маңызды оқиға. Еуразия жүрегінде орналасқан әлемдік беделге ие британдық оқу орнының кампусы – сенімнің, әріптестіктің және болашаққа деген стратегиялық көзқарастың нышаны. Бұл жай мектеп емес, идеялар мен болашақ көшбасшыларды тәрбиелеуге арналған экожүйе болады. Білім беру – инвестиция саласындағы басым бағыттардың бірі және біз осындай жобаларға жан-жақты қолдау көрсетуге дайынбыз. Ardingly Astana мектебі әлемнің түкпір-түкпірінен дарынды оқушылар мен педагогтарды тартатынына сенімдіміз», — деді ол.
Жобаның жүзеге асырылуы Қазақстан мен Ұлыбритания арасындағы білім беру және инвестициялық ынтымақтастықты нығайтудың маңызды кезеңі болады.
Анықтама үшін:
Ardingly Astana — Ұлыбританияның жетекші тәуелсіз мектептерінің бірі Ardingly College мектебінің филиалы. Оқыту ағылшын тілінде, бүкіл әлем университеттері мойындаған A-Level емтиханына дайындықты қамтитын Кембридж бағдарламасы бойынша жүргізіледі. Оқу үлгісі аналитикалық ойлау, тілдік және мәдени дағдылар, тарих және әдебиет салаларында кең ой-өріс қалыптастыруға бағытталған. Мектепте Ұлыбритания мен басқа елдерде жұмыс тәжірибесі бар халықаралық біліктілікке ие педагогтар еңбек етеді.
1858 жылы негізі қаланған Ardingly College — IB нәтижелері бойынша Ұлыбританияның ТОП-10 және A-Level бойынша ТОП-50 үздік мектептерінің қатарында (The Sunday Times). Мектеп түлектері жыл сайын Кембридж, Империал колледжі және Плющ Лигасы университеттері сияқты жетекші оқу орындарына түсіп отырады.
