Алматыда алғашқы халықаралық толық циклді геозертхана – GeoLab Eurasia құрылуда
Қазақстанда Орталық Азиядағы алғашқы халықаралық сертификатталған толық циклді тау жыныстарын талдау зертханасы – GeoLab Eurasia жобасы іске қосылуда. Бұл жаңа ғылыми-өндірістік орталық рудалардың құрамын және сапасын NI 43-101, JORC және ISO/IEC 17025 сияқты халықаралық стандарттарға сай жоғары дәлдікпен зерттеуге мүмкіндік береді.
Ел аумағында заманауи геоаналитикалық базаның құрылуы табиғи ресурстар қорын объективті бағалауға, сенімді экономикалық модельдерді құруға және инвестиция тартуға маңызды қадам болмақ. Зертхана қорларды растау процесін айтарлықтай жеделдетіп, шетелдік сервистерге тәуелділікті азайтып, қазақстандық геологияның жаһандық деңгейдегі бәсекеге қабілеттілігін арттырады.
Жобаның құрылтайшылары: академик Қ.И. Сәтбаев атындағы Геологиялық ғылымдар институты, Kepler Group және стратегиялық инвестор – Қытайдың Eurasia Mineral Standard компаниясы. Құрылтай құжаттарына қол қою рәсімі 2025 жылғы 23 шілдеде Алматы қаласында өтті. Ресми қол қою рәсіміне KAZAKH INVEST-тің Алматыдағы аймақтық өкілі Жамалдин Надыров та қатысты.
«Бұл жобаны біз тау жыныстарын талдаумен шектелмейтін, кадр даярлау мен озық тәжірибе алмасудың ұзақмерзімді алаңы ретінде қарастырамыз. Бұл – ғылым, технология және Қазақстан дамуының стратегиясы тоғысатын тарихи кезең» - деп атап өтті Қ.И. Сәтбаев атындағы геология институтының директоры, академик Асқар Сыздықов.
Сыртқы істер министрлігі Инвестициялар комитеті төрағасының орынбасары Сұлтан Кінжақұлов жобаның маңызын былай сипаттады:
«GeoLab Eurasia – бұл Қазақстанның индустриялық және ғылыми егемендігінің жаңа деңгейін көрсететін жоба. Мұндай бастамалар елдің шикізаттық жеткізу тізбектеріндегі сенімді серіктес ретіндегі халықаралық беделін де нығайтады.»
GeoLab Eurasia инфрақұрылымына екі негізгі нысан кіреді: Алматыдағы Геология институты базасындағы заманауи жабдықталған (ICP-MS, XRF, XRD) зертханалық-оқу орталығы және қала сыртындағы өндірістік түйін, мұнда сынама дайындау желілері мен үлгі сақтау қоймалары орналасады. Алғашқы нысан 2025 жылғы қазан айында, ал өндірістік торап – 2026 жылдың бірінші тоқсанында іске қосылады деп жоспарлануда.
GeoLab Eurasia-ның іске қосылуы Қазақстан геологиясының ғылыми және технологиялық базасының дамуына серпін беріп, халықаралық инвесторлардың сенімін арттырып, стратегиялық пайдалы қазбалар нарығындағы еліміздің позициясын күшейтеді.
