Америкалық сауда миссиясы Транскаспий дәлізінің әлеуетімен танысу үшін Ақтауға барды
Орталық Азиядағы ең ірі америкалық сауда миссиясының делегациясы Қазақстанға сапары аясында Маңғыстау облысына келді. Сапардың мақсаты – өңірдің инвестициялық әлеуетімен және Транскаспий халықаралық көлік дәлізінің (ТХКД, Middle Corridor) артықшылықтарымен танысу болды.
Бағдарлама аясында Маңғыстау облысының бизнес өкілдерінің қатысуымен дөңгелек үстел өтті. Қазақстан тарапынан «KAZAKH INVEST» ҰК» АҚ жобалық менеджері Әлия Абдильдина баяндама жасап, өңірдің инвестициялық мүмкіндіктеріне шолу жасап, Ақтаудың ТХКД-дағы негізгі хаб ретіндегі рөлін атап өтті.
Дөңгелек үстелде сөз сөйлеген «KAZAKH INVEST» ҰК» АҚ жобалық менеджері Әлия Абдильдина Қазақстан Транскаспий дәлізін тек транзиттік бағыт қана емес, еуразиялық өзара байланыстылықтың болашағына салынған стратегиялық инвестиция ретінде қарастыратынын айтты. Ол 2024 жылдың өзінде ғана дәліз арқылы жүк тасымалы көлемі 60%-ға артып, 4,5 млн тоннаға жеткенін, бұл оның жаһандық жеткізілім тізбектеріндегі бәсекеге қабілеттілігінің артып келе жатқанын дәлелдейтінін атап өтті.
«Қазақстан үшін ТХКД-ны дамыту – бұл қысқа мерзімді сынақтарға жауап емес, ұзақ мерзімді басымдық. Біз теміржол және порт инфрақұрылымын жаңғыртуға, цифрландыруға және рәсімдерді жеңілдетуге инвестиция салудамыз. Осы шаралардың арқасында транзит уақыты қысқарады, тиімділік артады және біз дәліздің халықаралық серіктестер үшін одан әрі тартымды болатынына сенімдіміз», – деді ол.
Америкалық делегация сондай-ақ Ақтау халықаралық теңіз сауда портына барып, мультимодальды тасымалдауға арналған логистикалық мүмкіндіктермен және инфрақұрылыммен танысты. Қатысушылар Транскаспий халықаралық көлік дәлізінің жоғары әлеуетін атап өтіп, Азия мен Еуропа арасындағы байланыстылықты қамтамасыз етудегі оның өсіп келе жатқан рөлін ерекше атады. Өткен жылы дәліз арқылы транзиттік тасымал көлемі екі есеге жуық артқаны, бұл оның халықаралық компаниялар үшін тартымдылығын және өңірлік сауданы дамытудағы маңыздылығын айғақтайтыны атап өтілді.
Маңғыстау облысы – елдің транзиттік әлеуетін іске асыруда негізгі рөл атқарады. Өңірде жылына 17 млн тоннадан астам жүк өткізу қуатына ие үш порт – Ақтау, Құрық және жеке «Саржа» терминалы бар. Осы хабтардың дамуы Қазақстанның Транскаспий халықаралық көлік дәлізіндегі стратегиялық қатысушы ретіндегі орнын нығайтады.
Ақтауға сапардың қорытындысында америкалық сауда миссиясының өкілдері логистика және инвестициялар саласында ынтымақтастықты одан әрі дамытуға дайын екендіктерін атап өтті. Қазақстан тарапынан Транскаспий дәлізі аясындағы ынтымақтастықты нығайту өңірдің транзиттік әлеуетін арттырып қана қоймай, бизнеске жаңа мүмкіндіктер ашатынына және сауда тізбектерін әртараптандыруға жол ашатынына сенім білдірілді.
