Қытайлық CRCC Қазақстандағы тау-кен металлургия кешені мен инфрақұрылымдық жобаларға инвестиция салуға мүдделі.
China Railway Construction Corporation (CRCC) өзінің еншілес компаниялары – Инвестиция тобы (CRCC International Investment Group) және Қытайдың құрылыс корпорациясы (CCESS) арқылы Қазақстандағы қызметін кеңейтуге дайын. Бұл туралы аталмыш компаниялардың өкілдері «KAZAKH INVEST» ҰК» АҚ басшылығымен келіссөздер барысында мәлімдеді.
Кездесу барысында тараптар Қазақстанға одан әрі инвестициялаудың әлеуетті мүмкіндіктерін талқылады. Атап айтқанда, агроөнеркәсіптік кешен, тау-кен металлургия кешені, жаңартылатын энергия көздері, жылжымайтын мүлік, көлік-логистикалық инфрақұрылым нысандары сияқты салалар талқыланды.
«KAZAKH INVEST» ҰК» АҚ Басқарма төрағасының орынбасары Жандос Темірғали қазіргі уақытта халықаралық инвестициялық қоғамдастықтың Қазақстанға өңдеуші кәсіпорындарды орналастыруға қызығушылығы артып отырғанын атап өтті. Сонымен қатар, ол халықаралық жағдайдың өзгеруіне байланысты Қазақстан үшін көлік бағыттарын әртараптандырудың өзектілігі артып отырғанын айтты. Атап айтқанда, Қытай мен Еуропаны байланыстыратын Орта және Оңтүстік дәліздер арқылы Жібек жолының заманауи инфрақұрылымын дамыту туралы айтып отырмыз.
«Қазақстан Республикасында инвестициялық жобаларды жүзеге асыру кезінде әлеуметтік құрамдас бөлікке назар аудару өте маңызды аспект болып табылады. Бұл, ең алдымен, Қазақстан азаматтарын жұмыс орындарымен, еңбек қауіпсіздігін және үздіксіз кәсіби дамуын қамтамасыз ететін лайықты бәсекеге қабілетті жалақысы бар жоғары сапалы жұмыс орындарымен қамтамасыз ету. Сонымен қатар, өндірістің жергілікті мазмұны мен экологиялық қауіпсіздігін арттыру мемлекет үшін басымдық болып табылады», - деді Жандос Темірғали Қытай тарапымен келіссөз барысында.
Өз кезегінде қытайлық серіктестер Қазақстандағы жобаларға 100 миллион АҚШ долларынан астам инвестиция салуға дайын екендіктерін, сондай-ақ «CRCC International Investment Group» аймақтық өкілдігін Ресейден Қазақстанға көшіруді жоспарлап отырғанын мәлімдеді.
«Дүние жүзінде 100-ден астам кеңсесі бар біздің холдинг мемлекет меншігінде. Біз Түркиядағы Анкара-Стамбул жоғары жылдамдықты желісі, Израильдегі Кармель туннелі, Макаодағы Сан Вай көпірі, Алжирдегі Шығыс-Батыс тас жолы және Танзания-Замбия темір жолы сияқты жобаларды іске асырдық. Қазақстанда біз мердігер компания ретінде 4 жоба бойынша жұмыс істеп жатырмыз және инвестициялық бөлімшеміз арқылы инвестор ретінде жаңа жобаларды жүзеге асыруға дайынбыз», - деді Орталық Азиядағы CCESS филиалының бас директоры Фан Лянцзюнь.
Анықтама: Бастапқыда Қытай Халық Республикасы Темір жол министрлігінің Сыртқы көмек департаменті болған China Civil Engineering Construction Corporation Co., Ltd. (бұдан әрі - CCECC) 1979 жылы Қытай Халық Республикасының Мемлекеттік кеңесінің мақұлдауымен құрылған. Қытай Халық Республикасы және халықаралық нарыққа шыққан алғашқы төрт сыртқы экономикалық кәсіпорынның бірі болды. 2003 жылы Мемлекеттік мүлікті бақылау және басқару комиссиясының мақұлдауымен компания қайта құрылымдалып, China Railway Construction Corporation Limited (CRCC) компаниясымен біріктірілді. Бүгінде бұл Қытайдағы теміржол құрылысының кілті бойынша жоғары біліктілігі бар ірі мемлекеттік кәсіпорын.
Қазақстандағы ағымдағы жобалар:
-
Жамбыл облысы Жамбыл ауданындағы суару каналдарын, су бұру жүйелерін қайта жаңғырту және орнату.
-
Алматы облысындағы Богутин вольфрам кен орнының тау-кен байыту кешенін салу жобасы.
-
Қызылорда облысының Шалқия кен орнындағы тау-кен жұмыстары (шахталық объектілердегі күрделі тау-кен және құрылыс-монтаждау жұмыстарын орындау).
- «Қызылорда-Жезқазған» автомобиль жолының учаскесін жаңарту.
