Астанада Пусан-Қазақстан логистикалық форумы өтті
2022 жылғы 21 қыркүйекте Астанада «KAZAKH INVEST» ҰК» АҚ қолдауымен Пусан Экономикалық даму агенттігі (BEPA) төрағалығымен Корея делегациясының жұмыс сапары аясында Пусан-Қазақстан логистикалық форумы ұйымдастырылды. Іс-шараға екі елдің мемлекеттік органдары мен бизнес-қауымдастықтарының өкілдері қатысты. Форум «Орталық Азия (Қазақстан) мен Оңтүстік Корея (Пусан) арасындағы логистикалық ынтымақтастықтың өзекті мәселелері» тақырыбында өтті.
Корея делегациясының сапарының мақсаты – Кореядан Еуропа елдеріне көлік бағыттарын дамыту үшін Орталық Азия елдерінің көліктік-логистикалық әлеуетімен танысу.
Форум барысында Корея тарапы Орталық Азия елдері арқылы ЕО елдеріне өнім тасымалдауға ниетті екенін мәлімдеді. Осылайша, BEPA басшысы Джин Янг Хён халықаралық жағдайдың өзгеруі бүкіл әлем үшін көлік бағыттарын әртараптандырудың өзектілігін арттыратынын атап өтті.
Өз кезегінде қазақстандық тарап бұл шараны өткізудің маңыздылығын айта отырып, Қазақстандағы жерүсті бағыттарын дамытудың келешегі туралы айтты.
Қазақстан Республикасы Сыртқы істер министрлігі Инвестициялар комитеті басқарма төрағасының орынбасары Ерлан Зейнешев соңғы бір жылда екі ел арасындағы тауар айналымы артып, маусым айында 3 миллиард доллардан астам соманы құрағанын айтты. Сондай-ақ, оның айтуынша, Кореядан Қазақстанға тікелей шетелдік инвестиция ағыны артып, соңғы 10 жылда шамамен 4,7 млрд долларды құрады.
Астана қаласы бойынша Инвестициялар және кәсіпкерлікті дамыту басқармасы басшысының орынбасары Азамат Абдуалиев Қазақстанда Корея капиталының қатысуымен 500-ге жуық заңды тұлға жұмыс істейтінін, қазіргі уақытта Астана құрылысында KIA, Dongil сияқты кореялық жетекші компаниялардың жобалары жүзеге асырылып жатқанын атап өтті. , т.б.
ҚР Индустрия және инфрақұрылымдық даму министрлігі Көлік саясаты және инфрақұрылымы директорының орынбасары Зейнолла Ахметжанов көршілес елдермен салыстырғанда Қазақстанның стратегиялық инфрақұрылымды жоспарлау саласында институционалдық әлеуеті жоғары екенін атап өтті. «Бір белдеу – бір жол» және Орталық Азия өңірлік ынтымақтастығы сияқты өңірлік бастамалардың серпінін пайдалануға бағытталған Қазақстанның «Нұрлы жол» инфрақұрылымдық даму стратегиясына ерекше назар аударылды.
Жауап ретінде, Донг Эуи университетінің логистика және тарату департаментінің профессоры Джо Сэм Хюн Пусан-Орталық Азия көлік бағытының жай-күйі туралы айтып, қазақстандық компанияларға логистикалық бағыттарды дамытуда ынтымақтастықты ұсынды.
Форумның екінші бөлігін екі елдің жеке компаниялары ашып, өз мүмкіндіктерін таныстырып, сауда жолдарын дамыту аясында елдерде атқарылған нақты қадамдарға тоқталды.
Корея тарапынан World Road express co., LTD, Unico Logistics сияқты жетекші көлік-логистикалық компаниялардың өкілдері таныстырылым жасады.
Өз кезегінде «KAZAKH INVEST» Ұлттық компаниясы» АҚ Жедел топ департаментінің жоба жетекшісі Азизхан Құдабаев Қазақстан Үкіметінің инвестициялық қызметке қолдау көрсетуімен таныстырды. Сонымен қатар, инвестициялық келісімшарттарды жасасудың негізгі шарттары: үлгі инвестициялық келісімшарт және инвестициялық келісім жарияланды. Сөзінің соңында кореялық инвесторларға инфрақұрылым мен көлік саласындағы перспективалық жобаларға қатысу және Астана халықаралық қаржы орталығының алаңында тіркелу мүмкіндігін қарастыруға шақырылды.
Шара соңында сұрақ-жауап, пікірталас және компаниялар арасында тәжірибе алмасу орын алды. Бұл шара Қазақстандағы көлік-логистикалық жобаларды бірлесіп дамыту бойынша екі ел арасындағы тұрақты диалог алаңына айналады деп жоспарлануда.
Корея делегациясы алдағы уақытта Қазақстанның логистикалық нысандарын: «Астана-Жаңа қала» АЭА, «Қорғас» АЭА, сондай-ақ Қазақстан-Қытай шекарасының логистикалық кешенінің басқа да нысандарын аралауды жоспарлап отыр.
