Инвестор СҚО-да рапс майының өндірісін кеңейтті
Шротты шаймалау бойынша жаңа цехты Солтүстік Қазақстан облысында «Тайынша-Май» ЖШС қазақстандық-қытайлық компаниясы іске қосты. «KAZAKH INVEST» ҰК» АҚ қолдауымен жүзеге асырылған жобаның жалпы сомасы $19 млн құрады, кәсіпорында шамамен 100 тұрақты жұмыс орны құрылды.
2016 жылы жылына 360 мың тонна рапс майын өндіретін зауыт іске қосылды. Кейін қытай компаниясының басшылығы май зауытын кеңейту туралы шешім қабылдады. Эскалация әкімшілік ғимараттың құрылысын, сыйымдылығы 5 мың тонна рапсты сақтауға арналған 5 силосты, сондай-ақ қуаты сағатына 50 тоннаны құрайтын 2 кептіру жабдығын және шаймалау цехын қамтиды. Жобаның қуаттылығы жылына 165 мың тонна шротты немесе 15 мың тонна майды құрайды.
«Біздің зауыт еліміздегі ең заманауи және технологиялық жабдықтармен жабдықталған. Май зауытын кеңейту жобасын 2019 жылы бастап, 2020 жылы аяқтауды жоспарладық. Бірақ пандемияға байланысты жаңа цехты іске қосуды кейінге қалдыруға тура келді. ҚХР-дан Қазақстанға жабдықтарды тасымалдауда бірқатар проблемалар туындады, сондай-ақ шетелдік жұмыс күшін тартуда қиындықтар болды. Бірақ, жергілікті әкімшіліктің, KAZAKH INVEST аймақтық өкілдігінің арқасында бұл мәселелер уақтылы шешілді және жобаның іске асуына ықпал етті», - деді «Тайынша-Май» ЖШС Бас директоры Фан Лунфей.
Инвестордың айтуынша, өңделген өнім Қытай мен Ресейге экспортталатын болады.
«Солтүстік Қазақстан - майлы дақылдарды өсіруде көшбасшы, егіс алқабы 1 млн.гектарға жететіні баршаға мәлім. Бұл инвестор рапсты өңдеу деңгейін арттыра отырып, ірі жобаны іске асырды. Кәсіпорын экспортқа бағдарланған, жоба толығымен жеке инвестициялар есебінен іске асырылды, мұның да маңызы аз емес. KAZAKH INVEST тарапынан ҚР СІМ Инвестициялар комитетімен инвестициялық келісімшарт жасасу кезінде көмек көрсетілді, оның шеңберінде бажсыз жабдықтар мен жиынтықтауыштар әкелінді», - деп атап өтті KAZAKH INVEST СҚО бойынша өңірлік директоры Данияр Шалабаев.
Айта кету керек, жобаны жүзеге асыру жаңа жұмыс орындарын құрып қана қоймай, өңірдің экономикалық және өнеркәсіптік әлеуетін дамытуға мүмкіндік береді.
