Бүгін Астана халықаралық қаржы орталығында Қазақстан-Моңғолия бизнес-форумы өтті. Оған Қазақстан Республикасы Премьер-Министрінің орынбасары және Ұлттық экономика министрі Серік Жұманғарин және Моңғолия Премьер-Министрінің бірінші орынбасары және Экономика және даму министрі Жадамбын Энхбаяр қатысты. Іс-шараға екі елдің мемлекеттік органдары мен бизнес қауымдастықтарының 300-ден астам өкілі қатысты.

Бизнес-форумды «KAZAKH INVEST» Ұлттық компаниясы» АҚ Қазақстан мен Моңғолия арасындағы сауда-экономикалық және инвестициялық ынтымақтастықты кеңейту мақсатында ұйымдастырды. Екі ел арасындағы жалпы сауда айналымы 58 млн доллардан асты.

Вице-премьер-министр Серік Жұманғарин құттықтау сөзін сөйлеп, Қазақстан мен Моңғолия арасындағы сауда айналымы өткен жылы 7%-ға өскенін, бұл өзара тиімді сауда қатынастарының дамуын көрсететінін атап өтті. «Келісімдерді дәйекті түрде жүзеге асыру, өнім түрлерін кеңейту, сауда кедергілерін азайту, көлік байланыстарын дамыту және жаңа бірлескен жобаларды іске асыру Қазақстан мен Моңғолия арасындағы экономикалық ынтымақтастықты жаңа деңгейге көтеретіні сөзсіз», - деді ол.

Моңғолияның бірінші вице-премьер-министрі Жадамбын Энхбаяр өз сөзінде елдер арасындағы стратегиялық серіктестік пен дипломатиялық қарым-қатынастардың тұрақты дамуын атап өтті және экономикалық ынтымақтастықты кеңейтудің негізгі мақсаттарын – сауда айналымын 500 миллион долларға жеткізуді атап өтті.

Сондай-ақ, іс-шарада Моңғолия Ұлттық сауда-өнеркәсіп палатасының президенті Баатарьявин Лхагважав, Қызылорда облысы әкімінің орынбасары Ардақ Зебешев, Баян-Өлгий аймағының әкімі Эсентайн Зангар және Қазақстан Атамекен сауда палатасының төрағасы Мұрат Каримсаков сөз сөйледі.

Бизнес-форум аясында «KAZAKH INVEST» ҰК» АҚ, Моңғолия Ұлттық сауда-өнеркәсіп палатасы, «QazTrade сауда саясатын дамыту орталығы» АҚ, Моңғолия Сыртқы істер министрлігінің Халықаралық сауда және экономикалық істер департаменті, Моңғолия экспедиторлары федерациясы, «Азық-түлік келісімшарт корпорациясы» ҰК» АҚ, «Green Group», «Атамекен» Ұлттық кәсіпкерлер палатасының төралқасы жанындағы Іскер әйелдер кеңесі, Моңғолия-Қазақстан бизнес кеңесі және «QazTextileIndustry» ӨБ өкілдерінің қатысуымен панельдік сессия өтті. Қатысушылар өз компанияларының қызметін таныстырды.

«KAZAKH INVEST» ҰК» АҚ Инвестициялар тарту және маркетинг департаментінің директоры Әсел Суанкулова Қазақстанның инвестициялық ахуалының артықшылықтары, ынтымақтастықтың негізгі бағыттары туралы айтып, моңғол компанияларын бірлескен жобаларды жүзеге асыруға шақырды.

Содан кейін 20 құжаттан тұратын қол қойылған пакетпен алмасу рәсімі өтті, оның ішінде теміржол вагондары мен астық жеткізуге арналған келісімшарттар, сауда, өнеркәсіп, туризм және халықаралық серіктестік, заманауи технологиялар мен биотехнология, жүн өңдеу өнеркәсібі, жабдықтарды жеткізу және логистика, өнер және басқа да салалардағы ынтымақтастық пен түсіністік туралы меморандумдар бар.

Форумнан кейін Қазақстан мен Моңғолияның бизнес өкілдері қатысқан B2B кездесулер өтті.