«KAZAKH INVEST» ҰК» АҚ Басқарма төрағасы Ержан Елекеев «WEIGAO» қытай корпорациясының өкілдерімен кездесу өткізді, оның барысында тараптар ҚР аумағында медициналық жабдықтар өндірісін оқшаулау мүмкіндігін талқылады.

Осылайша, WEIGAO бас басқарушысы Джанг Йонг қазақстандық өкілдерге жүрек-қан тамырлары ауруларына арналған коронарлық стенттер, протездер, қанды тазартуға арналған гемодиализ жабдықтары өндірісіндегі корпорацияның жұмысы туралы, сондай-ақ Қазақстанда өндірісті оқшаулау перспективалары туралы айтып берді. Бұған дейін weigao басшылығы ҚР Денсаулық сақтау министрі Ақмарал Әлназаровамен және ҚР СІМ Инвестициялар комитетінің төрағасы Ғабидолла Оспанқұловпен осы жабдықты өндіретін зауыт салу мүмкіндігін талқылау үшін кездескен болатын.

Кездесу барысында Басқарма төрағасы Е. Елекеев Қазақстанда өндірістерді оқшаулауға ұмтылатын қытайлық компаниялар санының оң өскенін атап өтті.

«Біз қытайлық бизнес-қоғамдастық өкілдері тарапынан өсіп келе жатқан қызығушылықты және Қазақстанда бизнес жүргізуге белсенді ұмтылысты қуана байқаймыз. Бұл ШЫҰ-ның өткен саммиті, Мемлекет басшыларының сапарлары және басқа да түрлі іс-шаралар шеңберінде жүргізілген табысты жұмыстың көрсеткіші болып табылады. Қазақстан мен Қытай экономикалық ынтымақтастықтың күшеюімен, бизнес-қоғамдастықтар байланысының нығаюымен және инвестициялар көлемінің ұлғаюымен сипатталатын қарым – қатынастардың жаңа кезеңіне қадам басуда», – деп атап өтті Е. Елекеев.

Сонымен қатар, Басқарма Төрағасы Қытай инвесторларына екіжақты ынтымақтастық шеңберінде мемлекеттік қолдау тетіктері мен шаралары, Қазақстанның инвестициялық ахуалы және денсаулық сақтау саласындағы жаңа перспективалы бағыттар туралы айтып берді. Атап айтқанда, құны 60 миллион доллардан асатын ірі жобаларға арналған инвестициялық келісімдердің жаңа тетігі таныстырылды.

Өз кезегінде WEIGAO өкілдері қазақстандық тарапқа уақыт бөлгені үшін алғыс білдіріп, перспективалы жобаларды іске асыруда табысты ынтымақтастыққа үміт білдірді.

WEIGAO медициналық жүйелер үшін кешенді, қауіпсіз және сенімді шешімдердің жаһандық жеткізушісі болып табылады және ҚХР аумағында 30 000-ға жуық қызметкері бар Қытайдың ең ірі 500 кәсіпорнының қатарына кіреді. Корпорация 1000-нан астам медициналық жабдықтар мен дәрі-дәрмектерді шығарады, ал оның сату желісі жақын және алыс шетелдердегі 100-ден астам өкілдіктерді қамтиды.